Dutkkus sámiid psyhkalaš dearvvašvuođa birra
Boahtte jagi galgá sámiid gaskka čađahuvvot dearvvašvuođadutkkus man ulbmil lea čohkket dieđuid boahttevaš našuvnnalaš strategiijii psyhkalaš dearvvašvuođa ja iešsoardineastadeami birra.
Ráđđehus lea gohččon Álbmotdearvvašvuođaeiseváldi ja Sosiálastivrra ovttas guvttiinlot iežá eiseválddiin čohkket dieđuid boahttevaš našuvnnalaš strategiijii psyhkalaš dearvvašvuođa ja iešsoardineastadeami birra. Okta dain eiseválddiin lea Sámediggi. Sámediggi lea ges gohččon Ubmeje universitehta čohkket sámiide guoskevaš dieđuid vai našuvnnalaš strategiijii maiddái bohtet dieđut sámi álbmoga psyhkalaš dearvvašvuođa ja iešsoardima birra.
Ubmeje universitehta epidemiija- ja globála dearvvašvuođaásahus galgá boahtte jagi dahkat iskkadeami mii sáddejuvvo visot sámiide geat lea čálihuvvon gaskaboddosaš sámi jienastuslohkui man válgalávdegoddi dohkkehii skábmamánus 2020.
–Dán suorggis lea nu unnán dutkojuvvon, lohká Jon Petter Stoor gii boahtá bargat dáinna dutkosiin. Mun sávan ahte nu olu sámit go vejolaš servet iskkadeapmái vai dat bures sajustuvvo dutkanoktavuođas.
–Dutkosa boađus šaddá stuora oassin dan raporttas maid mii čállit Sámedikki ovddas, čilge Jon Petter Stoor.
Sámediggi galgá čohkket vuođđodieđuid našuvnnalaš strategiijii, ja evttohit mihttomeriid ja vuoruhemiid sámiide. Ráđđehusa áigumuš lea háhkat buriid eavttuid oktiiheivehit ja ovttasdoaibmat, ja maiddái loktet kvalitehta, beaktilvuođa ja bistevašvuođa dain áŋgiruššamiin maid eiseválddit, regiovnnat, gielddat ja iežá oassebealit álggahit psyhkalaš dearvvašvuođasuorggis.
–Mii diehtit ahte lea olu mii galgá dahkkot dán suorggis vai sámit ožžot buori, dohkálaš ja dásseárvosaš psyhkalaš dearvvašvuođadivššu. Sámiin lea unnán luohttevašvuohta buohccidikšui, ja sii ohcalit buoret kulturgealbbu dikšosuorggis, lohká gaskaboddosaš hálddahushoavda Anita Kitok.
–Dál sáhtát don gii leat sápmelaš addit buori vuođu iskkadeapmái jus searvvat dasa 2021 giđa, ávžžuha Anita Kitok.
Váldde oktavuođa
Jon Petter Stoor, dutki
tel. 090-786 58 63
petter.stoor@umu.se
Anita Kitok, gaskaboddosaš hálddahushoavda
tel. 0980-681 98
anita.kitok@sametinget.se