Ođđa áppa Čoalkkuhetnot!–juovlaskeaŋka sámi mánáide
Dán jagi ožžot sámi mánát juovlaskeaŋkka Sámi Giellaguovddážis. Giellaguovddáš lea jorgalan girjjii Knacka på! sihke nuorta-, julev- ja oarjánsámegillii, ja otnáža rájes sáhttá dan viežžat nuvttá App Storas.
Sámi giellaguovddáš lea ovttas Alfabeta Bokförlagain jorgalahttán hui bivnnuhis mánáidgirjji sámegillii. Girjji Knacka på! lea Anna-Clara Tidholm čállán, dat almmuhuvvui vuohččan 1992:s ja heive hui bures unnimus mánáide. Girji lea jorgaluvvon 15 gillii ja gávdno áppan sihke iPhonii ja iPadii – ja dál dat gávdno sámegillii maid. Sámegiel áppa lea nuvttá (girji maid deaddiluvvo 2016 mielde).
- Mánát leat dehálepmosat, sámegiela boahtteáigi lea sin duohken. Mii leat nu ilus go dál beassat fállat dán áppa sámegillii, lohká Anders Östergren, Sámi giellaguovddáža giellakonsuleanta. Áppa lea Sámi giellaguovddáža juovlaskeaŋka visot sámi mánáide.
Sápmi Knacka på! – prošeakta ja Čoalkkuhetnot! – áppa lea Giellaguovddáža áŋggirdeapmi min nuoramusaid váste. Sámi giellaguovddáš bargá giellaealáskahttimiin, ja galgá ovddidit ja movttiidit eanebuid geavahit sámegiela. Giellaguovddáža bargguide gullá metodaid ovdánahttin vai ovttaskas olmmoš buorebut sáhttá geavahit ja váldit ruovttoluotta giela. Mánát ja nuorat galget eareliiggánit vuoruhuvvot.
- Mii Sámi giellaguovddážis jáhkkit ahte dán áppii liikojit sihke mánát ja váhnemat, beroškeahttá giellamáhtuin, dadjá Anders Östergren, giellakonsuleanta Deartnás.
- Mánáidkultuvra lea álo hui ávkkálaš ja movttiideaddji giela ja ipmárdusa ektui, muhto lea erenoamáš suohtas go ođđa teknologiija veahkeha mánáid, váhnemiid ja pedagogaid nu dego Čoalkkuhetnot! - áppa dahká, lohká Svante Tidholm, áppa buvttadeaddji Alfabeta Bokförlag AB:s.
Mii válljiimet jorgalit Knacka på! danin go das leat dat kvalitehtat maid mii Giellaguovddážis ohcaleimmet. Sihke teaksta ja govat boktet mánáid sáhkkiivuođa, ja áppa ja girji leat lunddolaš interaktiivat. Ja mánát hirbmosit liikojit daidda! Lea maiddái mávssolaš sámegiela árvui ahte dákkár áppat ja girjjit gávdnojit sámegillii.
Áppa sáhtát viežžat sihke nuorta-, julev- ja oarjánsámegillii. Áppas sáhttá maid báddet iežas jiena vai sáhttá hutkat vel eanet suohttasiid mánáide.
Sámi giellaguovddáš lágida preassadeaivvadeami áppa almmuheami oktavuođas Jiellevári sámeskuvllas. Dohko bohtet áppa buvttadeaddji Svante Tidholm, ja Sámi giellaguovddáža bargit. Deaivvadeamis lea vejolaš jearahallat ovdaskuvlla bargiid ja mánáid.
Media lea buresboahtin bearjadaga juovlamánu 18 b dii 10 rájes go mii guossohit gáhku!
Báiki: Jiellevári sámeskuvla, Skierri ovdaskuvllas
Váldde oktavuođa:
Anders Östergren, Sámi giellaguovddáš
070-598 40 09