Suodjalusministara guossis
Sámedikki stivraságadoalli Håkan Jonsson lea fitnan Ruoŧa suodjalusministara Peter Hultqvist guossis.
Militeara doaimmat Sámis
Ulbmilin lei muitalit ministarii Sámedikki dáhtu beassat ráđđádallat stuora suodjalushárjehallamiid, báhčinšiljuid viiddidemiid ja iežá suodjalusdoaimmaid oktavuođas. Håkan Jonsson gáibidii vel nuppes beassat deaivvadit ministariin gávnnahan dihte vugiid govt dialoga sáhtálii buoridit.
- Lea hoahppu oažžut áigái doaibmi dialoga ja dan fertet váldit ovdan dál, lohká Håkan Jonsson. Muhto guhkit áiggi vuollái dáhttut mii nai obbalaš ráđđádallanortnega ráđđehusain visot áššiin mat gusket sámiide, seammeládje go Norgga Sámedikkis lea.
Dialoga
Sámediggi sávvá ahte dialoga loktelii ipmárdusa eanan- ja čáhcegeavaheapmái Sámis.
Oktavuođaolmmoš:
Sámedikki stivraságadoalli Håkan Jonsson
070-372 10 10