Ulbmil doarjagiin lea oažžut eanet nuoraid álgit boazodollui. Máŋgga čearus leat dál unnán nuorra boazobargit, ja ulbmil lea jorgalahttitdán dili ja vuoruhit nuorra boazobargiid geat leat easkka álgime hukset boazodoallofitnodagaset. Boazodoalu boahtteáigi lea hui olu dan duohken sáhttet go ja dustet go sámi nuorat álgit dakkár ealáhussii mii lea hui váttis ja gáržžes dilis. Danne ferte bidjat liige návccaid doarjut ja movttiidahttit sihke nuorra nissoniid ja nuorra dievdduid álgit boazodollui.

Doarjja galgá vuosttažettiin geavahuvvot guoddevaš ealu ceggemii dannego ealáhusvuođđu lea eaktun jus boazodoallofitnodat galgá nagodit gilvalit ja ovdánit. Boazodoallu lea dehálaš vuođđu ja kulturguoddi sihke sámi giela ja kultuvrra ektui. Okta vuođđojuolgi lea máhttosirdin boarráset buolvvas nuoraide, addit ja háhkat sámi árbemáhtu lea eaktun jus sámi boazodoallu galgá seailut boahtteáiggis. Doarjja galgá deattuhit árbevirolaš sámi máhtu ja sihkkarastin dan de gáibiduvvo álggahanáiggis nevvodeaddji dehe mentor.

Mii gáibiduvvo?
Dá leat muhtun gáibádusat:

• Don leat vuollel 40 jagi.
• Dus lea nevvodeaddji gii lea boarráset go don. Doarjja deattuha árbemáhtu sirdima boarráset buolvvas nuorabui.
• Don it oaččo leat leamaš boazodoallofitnodatdoalli eanet go 24 mánu go ozat.
•  Dus galgá leat joatkkaskuvlaoahpahus ja boazodoallooahpahus unnimusat logi vahkku (20-25 oahpahusdiimmu vahkkus).
• Don galggat ráhkadit fitnodatplána e-bálvalusas go sáddet ohcamuša.
• Don galggat álggahit iežat doaimmaid maŋemusat ovcci mánu maŋŋelgo leat ožžon mearrádusdieđu.

Eanandoallodoaimmahaga ruovttusiiddus leat olu eanet dieđut.