Maŋemus vahkkuid lea leamaš olu sáhka bohccogoddináššiin ja bohccuid biinnideamis Norrbottenis. Bohccot oaguhuvvojit skohteriiguin ja illástuvvojit nu báhui ahte fertejit heakkahuhttot. Bohccuid biinnideamit leat govvejuvvon ja govat leat leavvan sosiála mediain, ja oaidnit dáid vearredaguid sihke suhttada ja suorggaha olbmuid. Lea issoras biidnu bohccui ja dát dagut jur vuollánahttet boazoeaiggádiid. Lea hui surgat go rasisma maid sámit ja eareliiggánit boazosámit gillájit maiddái čuohcá bohccuide.

Ruoŧa Sámiid Riikkasearvi mii lea boazodoalu beroštusorganisašuvdna gáibida dál preassadieđáhusas ahte poliissat ja leanastivrra duođas bidjet návccaid bissehit boazobiinnidemiid. Searvvi ságadoalli Jörgen Jonsson atná hui deaŧalažžan ahte servodat ja servodatnjunnošat čielgasit čájehit vuostehágu dáidda lobihuššamiidda, ja ahte bidjet áiggi ja resurssaid čoavdit dáid láhkarihkkosiid.

Maiddái Sámedikki boazodoallolávdegoddi vuostálastá dáid láhkarihkkumiid mat orrot leavvame.

- Bohccuid oaguhit muohtaskohteriin, goddit ja beljiid čuohppat vai ii oainne gean boazu lea, dákkár vearredagut eai gula doaibmi riekteservodahkii, lohká boazodoallolávdegotti ságadoalli Torkel Stinnerbom.

Dáhpáhuvvá maid ahte ruovderaŧiidáiddit čuhppojuvvojit rastá vai muohtaskohteriin  sáhttá njulget rastá raŧi. Boazu dolle raŧi mielde jus beassá áiddi čađa ja ii deaivva šat eret ruovderaŧis. Boazu sakka biidnašuvvá jus vuojáhallo togii iige jáme dasttánaga. Dat lea maiddái stuora bargobirasváttisvuohta sihke boazoeaiggádiidda, raŧŧebargiid ja togavuddjiide.

Čearut lea vártnuhis dilis go dovdet ahte ii leat ávki poliisii ilmmuhit dáid rihkkumiid. Poliissat dárbbahit duođaštusaid ja olbmuid geat dustet vihtanuššat jus galget sáhttit dutkat ášši dárkileappot. Stinnerbom danin ávžžuha buohkaid geat oidnet dehe dihtet maide dáin vearredaguin váldit oktavuođa poliissaiguin. Lea bággu bissehit dáid láhkarihkkumiid.