Sámedikki stivra šálloša ahte ráđđehus dál lea addán Jokkmokk Iron Mines fitnodahkii lobi roggat Kallak K nr 1 gasku Jåhkågasska čearu eatnamiid. Vaikko leat olu buorit ákkat leamaš dán vuostá de vállje ráđđehus goitge hilgut sámi álgoálbmoga oainnu.

— Muhto leimmet maid vuordán ahte šaddá ná go diehtit daid signálaid maid ealáhusministtar Karl-Petter Thorvaldsson ovdal lea addán, oaivvilda Sámedikki stivraságadoalli Håkan Jonsson.

—Stivra duođai šálloša go ráđđehus dáinna mearrádusain rahpá vel ovtta ruovdemálbmaruvkke davvin, vaikko sámit leat vuosttaldan dan ja vaikko olu iežá guovddáš ásahusat leat gieldán dan, lohká stivraságadoalli Håkan Jonsson.

Sámiide lea ruvkevuostálastin Gállokis leamaš prinsihppaáššin. Dákkár ruvke billista hearkkes luonddu ja eatnamiid, ja dat boahtá garrasit heađuštit guoskevaš čearuid ja iežá sámiid geat bivdet dáin eatnamiin.

Ráđđehus čuoččuha ahte lea bidjan garra eavttuid ruvkefitnodahkii maid dat ferte čuovvut vai ii muosehuhte boazodoalu. Daid eavttuid ollašuhttin galgá gul leahkit eaktun oažžut lobi roggat sihke dál ja maŋit áigái.

—Ráđđehus čuoččuha iežas bidjan garra gáibádusaid ruvkefitnodahkii muhto dat orrot dušše dego loastarat čiekŋalis háviide, oaivvilda Sámedikki stivraságadoalli Håkan Jonsson.

—Ráđđehusa ráđđádallanortnet man aitto leat dohkkehan lei gusto dušše vuohki mohkastit sámiid, dadjá Håkan Jonsson. Eiseválddit vigget jáhkihit ahte sámiin lea dadjamuš, muhto nu ii leat duohta máilmmis. Ráđđehus čájeha čielgasit ahte ruvkeealáhus manná ovdalii visot eará beroštumiid.

Loahpas dieđiha Sámedikki stivraságadoalli Håkan Jonsson ahte Sámedikki stivra ii boađe luoitit dán ášši, muhto áigu dárkilit čuovvut ášši viidáseappot.

Váldde oktavuođa:

Håkan Jonsson
Stivraságadoalli
Tel. 070-372 10 10
hakan.jonsson@sametinget.se