Sámedikki stivra lea suorganan go oaidná artihkkala Expressen aviissas čakčamánu 6 beaivvi 2021, dan rasismma birra maid sámit gillájit valáštallanservodagas. Artihkkalis muitala 17-jahkásaš spábbačiekči Hilda Granberg got son lea vásihan rasismma sámiid vuostá.

Sámedikki stivraságadoalli Håkan Jonsson lohká:

- Dát ii leat midjiide ođas, muhto lea hirbmat duođalaš daningo lea nuoraid vuostá, ja nugo dál go lea spábbačikčiid gaskkas.

- Sámediggi vuostálastá juohkelágán rasismma, ja gáibida ahte Ruoŧa spábbačiekčanlihtut bidjet johtui garra bijuid maiguin vuosttaldit rasismma sámi spábbačikčiid vuostá, lohká Håkan Jonsson.

Nubbi váilevašvuohta lea ahte sámi valáštallan ii oaččo ekonomalaš doarjaga. Sámi valáštallanlihttu ii beasa Riikkavaláštallanlihttui, ii ge oaččo oasi dain doarjagiin mat mannet Riikkavaláštallanlihtu bokte. Ággan lea ahte sámi valáštallanlihttu dieđus dušše organisere sámiid.

Sámi valáštallansuorggit leat omd. njorostallan ja boazovázzigilvvut mat čatnasit árbevirolaš eallindábiide, muhto maiddái viehkan, sisbandy ja spábbačiekčan. Sámiin lea sierra spábbačiekčanriikkajoavku nai, FA Sápmi mii gokčá sámi guovllu sihke Ruoŧas, Norggas ja Suomas, ja mas leat joavkkut sihke senior- ja juniordásis.

Áidna doarjja maid Sámi valáštallanlihttu oažžu jahkásaččat lea sullii 600 000 kr, mii lea binnáš stáhta ollislaš kulturdoarjagis Sámediggái. Sámi valáštallan šaddá danin gilvalit sámi kulturbargiiguin, sámi teáhteriin, duojáriiguin, musihkkáriiguin ja iežáiguin, ja dát juolludus ii leat heađisge nohkka buohkaide geat ohcet.

- Dát lea dat maid gohčodit struktuvrralaš rasisman – go vuogádat ii vuhtiiváldde daid eareliiggánis eavttuid maid vuolde sámi álgoálbmot šaddá eallit, loahpaha Håkan Jonsson, Sámedikki stivraságadoalli.

Váldde oktavuođa:

Håkan Jonsson,
stivraságadoalli
Tel. 070-372 10 10