Ságadolliid čoahkkin galggai rievtti mielde dollot Jåhkåmåhkes guovvamánu 18 beaivvi, muhto pandemiija geažil dollui čoahkkin baicca digitála hámis. Čoahkkimii serve riikkabeaivvi nubbe várreságadoalli, Sámedikki ságadoalli ja golbma lávdegoddeságadoalli čalmmustahttin dihte sin ovddasvástádussurggiid. Čoahkkima ulbmil lei fuomášuhttit demokratiijaáššiid, eareliiggánit Sámedikki barggus.

- Mii ságasteimmet demokráhtalaš eavttuid birra Sámedikki ektui ja Sámedikki politihkkáriid ektui. Sámedikki ovddasteaddjit cuigejedje ahte olu sámepolitihkalaš áššiid livččii vejolaš čoavdit jus beare Sámediggi oččošii ovddasvástádusa ja resurssaid daid gieđahallat. Okta ovdamearka lea ee. ahte máŋga sámi guoskevaš kulturášši lea biddjon ruoŧa ásahusaid vuollái, muitala Paulus Kuoljok.

Digitála čoahkkin lágiduvvui oassin demokratiija 100-jagiávvudeamis mii lea 2021:s. Ávvudeapmi čalmmustahttá ahte lea 100 jagi áigi dan rájes go nissonolbmot ja dievdoolbmot ožžo dábálaš ja seammaárvosaš jienastanvuoigatvuođa Ruoŧas, ja leat máŋga aktevrra riikkas mat fuomášuhttet demokratiija iešguđet láhkai.

- Parlameantan Ruoŧas livččii lunddolaš ahte ásahuvvoše ovttasbargovuogit gaskal Sámedikki ja Riikkabeaivvi, nanne Kuoljok.

2020:s ja 2021:s čađaha ráđđehus ee. našuvnnalaš áŋgiruššama "Demokratin 100 år – samling för en stark demokrati" (Demokratiija 100 jagi – nana demokratiija čohkken) sihkkarastin dihte ealli ja ceavzilis boahttevaš demokratiija. Sámediggi lea maiddái ožžon ráđđehusas bargogohččosa mas galgá nannet sámiid beroštumiid ja vejolašvuođaid aktiivvalaččat oassálastit demokratiijas, ja galgá eareliiggánit deattuhit nuorra sápmelaččaid sajádaga.

Váldde oktavuođa:
070-322 83 01
paulus.kuoljok@sametinget.se