Sámi giellaguovddáš lágida vihtta digitála giellaeahkeda (Zoom meeting bokte) main sámegiella lea gulahallangiellan. Giellaeahkediin lea iešguđetlágán sisdoallu, ja mii sávvat ahte oassálastit aktiivvalaččat servet dáidda. Giellaeahkediid dáhpáhusaide ferte ovdalgihtii dieđihit Likssjuo Medborgaskuvlla neahttasiiddu bokte go dat lea min ovttasbargoguoibmi dáid gáiddus giellaeahkediid lágideamis.

- Mii lágidit digitála dáhpáhusaid juohke sámegiela várás main sámegiella lea gulahallangiellan, muitala Sylvia Sparrock gii lea Sámi giellaguovddáža bargojođiheaddji.

Koronadávdda geažil ii sáhte Sámi giellaguovddáš lágidit fysalaš deaivvademiid, muhto geahččala baicca gáiddusčovdosiid bokte čađahit gielladáhpáhusaid. Juohke giellaeahkedii leat bovden logaldalliid ja gussiid geat sárdnot eatnigielaset. Mánnodaga lea bihtánsámegiela ja julevsámegiela eahket, disdaga oarjánsámegiela, gaskavahkku ubmisámegiela ja duorastaga ges davvisámegiela giellaeahket.

- Digitála čovdosat addet buohkaide vejolašvuođa oassálastit iežaset gillii, beroškeahttá gos orru. Muhto dát addá maiddái vejolašvuođa čuovvut iežá gielaid giellaeahkediid ja oahpásnuvvat visot sámegielaide. Dáinna lágiin šaddá hui čielggas man ovttastahtti fápmu gielas lea, ja got dat duddjo sámi servvolašvuođa, lohká Lars Miguel Utsi, Sámedikki giellalávdegotti ságadoalli.

Ulbmil giellavahkkuin lea čalmmustahttit iežamet sámegielaid visot servodatsurggiin, juohkit máhtu sámegielaid birra ja loktet sámegielaid árvvu. Ruoŧa, Norgga ja Suoma sámedikkit lágidit gielladoaimmaid máŋgga dásis servodagas giellavahkku oktavuođas. Sosiála mediat, filmmat ja deaddiluvvon ávdnasat bohtet geavahuvvot nu ahte giellavahkku sihke oidno ja gullo. Sámeskuvllain, máŋgga hálddašangielddas, sámi organisašuvnnain ja iežáin leat maiddái iežaset doalut dán vahkku.

- Mii sávvat ahte min rikkis sámi gielat gullojit, oidnojit ja geavahuvvojit olles vahkku, ja ahte buohkat geavahit fáddágilkoriid #giellavahkku2020 #giellavahkko2020 #giällavahkkuo2020 #gïelevåhkoe2020 sosiála mediain, loahpaha Ingegerd Vannar, Sámi giellaguovddáža bargojođiheaddji.

Prográmma ja dieđut

Loga eanet dáppe https://www.sametinget.se/sprakvecka.

https://www.facebook.com/events/1101984853578168.

https://giellavahkku.no/program-2/ siiddus gávnnat visot giellavahkku dáhpáhusaid olles Sámis. 

Geavat áinnas dáid fáddágilkoriid sosiála mediain.

#giellavahkku2020
#giellavahkko2020
#giällavahkkuo2020
#gïelevåhkoe2020

Oktavuođaolbmot:

Ingegerd Vannar, Sámi giellaguovddáža bargojođiheaddji, 070- 298 16 61, ingegerd.vannar@sametinget.se

Sylvia Sparrock, Sámi giellaguovddáža bargojođiheaddji, 070 - 646 63 99, sylvia.sparrock@sametinget.se

Lars Miguel Utsi, Sámedikki giellalávdegotti ságadoalli ja stivrra várreságadoalli, 070-349 29 68, larsmiguel.utsi@sametinget.se