Lea dárbu doaimmaide vai sámegielat seilot
Sámediggi lea Ruoŧa ráđđehusas ožžon bargogohččosa hábmet ollislaš guhkesáiggi doaibmaprográmmaevttohusa sámi gielaid suodjaleami várás. Doaibmaprográmma ulbmil lea defineret doaimmaid mat gáibiduvvojit jus sámi gielat galget ealáskahttot ja seailut eallin giellan Ruoŧas.
Doaibmaprográmma addá struktuvrralaš oppalašgova das mii gáibiduvvo giellamolsunproseassa jorgalahttit mii lea juo mannan oalle guhkas. Sii geat sárdnot sámi gielaid ja buohkat geat juogaládje guddet sámegiela, leat gait deháleamos resursan giellaealáskahttima proseassas. Eanas doaibmaevttohusat dán prográmmas leat jurddašuvvon nannet ovttaskas olbmo vejolašvuođa oahppat, ealáskahttit dahje nannet iežas sámegiela.
Doaibmaprográmmaevttohus lea dál ovddiduvvon ráđđehussii. Maid sávvá giellalávdegotti ságadoalli Lars Miguel Utsi ahte ráđđehus dahká dáinna evttohusain?
- Mun lea dulkon ahte kulturministaris Amanda Lindas lei duohta dáhttu dáinna bargogohččosiin Sámediggái. Danin eaktudan ahte ráđđehus ásaha nana doaimmaid maiguin rievdada dan maid sáhttá. Ovdamearkka dihte ahte ráhkada sierra sámi giellalága, ja johtui bidjá guhkilmas doaimmaid oahpahussuorggis vai sihkkarastá doaibmi oahpahusráiddu.
Oahpahussuorggis dárbbašit eanet struktuvrralaš ja strategalaš doaimmaid vai nuorat válljejit váldit oahpu eatnigieloahpaheaddjin, giellabargin ja dulkan. Jus oahpahussuorggis eai leat doaibmabijut, de dáidet oanehis áiggi doaimmat mat álggahuvvojit sámegiela nannema ja ealáskahttima várás, buoridit dili dušše veahá, muhto dat ii leat doarvái ealáskahttit sámi gielaid ja duddjot ahte sámi gielat šaddet ealli giellan servodagas.
-Mun sávan ahte ráđđehus ulbmillaččat joatká barggu sámi gielaid nannemiin. Midjiide sámiide ja boahttevaš sámi buolvvaide leat hirbmat dehálaš ahte sámi gielat besset seailut ja ahte dain lea mearkkašupmi servodagas, lohká Lars Miguel Utsi.
Našuvnnalaš unnitloguid gáhttema rámmakonvenšuvnnas ja Eurohpalaš báikegodde- ja unnitlogugielaid julggaštusas celko ahte juohke unnitloguálbmogiin ja juohke gielain galgá meannuduvvot nu got guoskevaš unnitloguálbmoga olbmot ieža dáhttot, ja got dárbbašuvvo juohke unnitlogugiela várjaleami ja ovddideami dihte. Dat mearkkaša ahte sámiiguin ja sámi gielaiguin galgá meannudit sin sierranas dárbbuid ja eavttuid ektui main leat lagas čanastagat giela, kultuvrra, eatnamiid ja čáziid gaskka.
Gulahallanolmmoš:
Lars Miguel Utsi, tel. 070-349 29 68
Sámedikki giellalávdegotti ságadoalli
Sámedikki stivrra várreságadoalli
