Čearuid bargu lea oassin Sámedikki ja leanastivrraid barggus dálkkádatheivehemiin, Jus dáid doaimmaid galgat nagodit čađahit resurssaid ja áiggi dáfus, de fertet daiguin bargat guhkit áiggi vuollái. Čearut ožžot doarjaga RSR:s, Sámedikkis, guoskevaš leanastivrras ja SMHI:s.

Doaibmaplánabarggu vuođđun lea Sámedikki dálkkádatheiveheami doaibmaplána mii dohkkehuvvui 2016:s. Sámedikki doaibmaplána deattuha sámi ealáhusaid ja sámi kultuvrra, maid Sámediggi lea geatnegas ovddidit. Leanastivrrat boazodoalloguovllus leat dahkan soahpamušaid main lohpidit searvat dán bargui, ja addit doarjagiid áŋgiruššamiidda mat bistet vihtta jagi, ja mat čađahuvvojit vuoruid mielde.

Ulbmilin lea oažžut ollislaš gova das got dálkkádatrievdamat váikkuhit boazodollui, identifiseret čuolmmaid ja guorahallat vejolaš doaibmabijuid. Čielga doaibmaplána mas leat čielga mihttomearit ja čovdosat, addá čearuide, mearrádusdahkkiide ja eiseválddiide vejolašvuođa hábmet eastadandoaimmaid nu ahte boazodoallu ja sámi kultuvra buorebut sáhttá dustet dálkkádatrievdamiid.

Ulbmil lea ahte čearut mat leat searvan dán bargui galget:

• Oažžut dieđuid das got dálkkádatrievdan váikkuha sin guovllus
• Oažžut dieđuid ja gealbbu hábmet čovdosiid, ja ráhkadit plánaid dasa got čovdosiid duohtandahká

2018:s čađahuvvui pilohtaprošeakta. Njeallje čearu iešguđet guovllus ledje mielde; Ängeså, Sirges, Ran ja Ohredahke, ráhkadedje alcceseaset dálkkádat- ja hearkivuođaguorahallamiid, ja dálkkádatheiveheami doaibmaplánaid. Dán pilohtaprošeavttas válde maid vuođu SMHI dálkkádatdieđuin vai daid sáhttá geavahit RenGIS:s, ja čállui maiddái bagadus SMHI dálkkádatdieđuide.

Dán njealji čearu doaibmaplánain gávdno syntesraporta. Dat lea vuođđun dáid bargguid gaskkusteamis go Sámediggi ain joatká iežas dálkkádatheiveheami doaimmain.