Ii leat dohkálaš ahte riiddut lassánit
Álgoálbmogiid rievttit leat olmmošvuoigatvuođat. Dat vaššiságat ja áitagat mat leat leavvan sosiála mediain maŋemus áiggiid leat áibbas dohkkemeahttumat, cealkiba Leanastivra ja Sámediggi oktasaš cealkámušas.
Lei Alimus duopmostuollu mii duomus ođđajagimánu 23 beaivvi attii Girjása čerrui aktovuoigatvuođa addit bivdin- ja guolástanlobi čearu eatnamiin.
Maŋŋelgo duopmu lei celkon álge sosiála mediain leavvat vaššiságat ja vašši kommentárat sámiid vuostá.
Norrbottena leana leanahearrá Björn O. Nilsson, ja Sámedikki stivraságadoalli Per-Olof Nutti atniba ahte dákkár vašši sámiid vuostá lea áibbas dohkkemeahttun:
—Girjásášši duopmu lei áibbas čielggas ja čuovvu ollásit doaibmi riektestáhta ja min demokráhtalaš prinsihpaid. Lea áibbas lunddolaš duomuid digaštallat demokráhtalaš vuoiŋŋas, muhto eahpetoleránssa ja áitagiid gal ii sáhte eisege dohkkehit.
- Leanastivrra bargu lea ovddidit olmmošvuoigatvuođaid leanas ja dan barggu gal váldit hui duođas. Álgoálbmoga rievttit leat olmmošvuoigatvuođat, ja maiddái regionála vejolašvuođat maid mii galgat ovttas suddjet, lohká Björn O. Nilsson, Norrbotten leana leanahearrá.
—Muhtunat leat dáinna duomuin suhttan, muhto Sámediggái leat maid boahtán olu lihkkusávaldagat ruoŧelaččain miehtá riikka. Dat addá boahtteáigedoaivaga. Juohkelágán vealaheapmi ja áitagat leat áibbas dohkkemeahttumat gos dál de ležžet vuolgán, lohká Sámedikki stivraságadoalli Per-Olof Nutti.
Váldde oktavuođa
Björn Nilsson
Leanahearrá
E-boastačjuhus Björn Nilsson
Tel. 010-225 54 82
Per-Olof Nutti
Sámedikki stivraságadoalli
E-boastačujuhus Per-Olof Nutti
Tel. 0980-780 27
