Árktalaš álgoálbmogat EU-čoahkkimis Ubmis
Golggotmánu 3-4 beivviid 2019 dollui Ubmis EU Arctic Forum. Doppe lágiduvvui dialogaságastallan álgoálbmotáššiid birra gos sámit ja ruonáeatnanlaččat besse ovdanbuktit oainnuideaset.
Ruoŧŧa ja EU lágideigga EU Arctic Foruma ovttas, ja dat lei golmma oasis; alladási-sešuvdna, nu gohčoduvvon "stakeholder session" mas leat panelaságastallamat, ja de vel álgoálbmotdialoga.
EU-kommišuvdna lei váldolágideaddjin álgoálbmotdialogas Arctic Indigenous Peoples’ Dialogue. Ulbmil dáinna ságastallamiin lei ahte álgoálbmotovddasteaddjit EU árktalaš guovlluin besset lonohallat vásáhusaid ja jurdagiid, eareliiggánit ealáhusaid ja olmmošvuoigatvuođaid birra, riikkaidgaskasaš ovttasbarggus, dálkkádaga ja birrasa ja ceavzilis investeremiid birra.
Dialoga rahpe báikegoddeministtar Jennie Nilsson, EU árktalaš ambassadevra Marie-Anne Coninsx ja Sámedikki stivraságadoalli Per-Olof Nutti. Per-Olof Nutti sáhkavuoru gávnnat olgešbealde.
Dialogas ledje guokte sierra ovdanbuktima. Chris McDonald bijai ovdan OECD raportta ”Linking Indigenous Communities with regional development” ja David Mair gii bargá kommišuvnna dutkanossodagas (Joint Research Centre) ovdanbuvttii prošeavtta ”Arctic: Traditional Knowledge, Livelihoods and Community Engagements”.
Dasto lei interaktiiva paneladigaštallan Sámi ja Ruonáeatnama álgoálbmotovddasteddjiiguin. Panelas ledje:
- Åsa Larsson Blind, Sámiráđi presideanta
- Mininnguaq Kleist, Ruonáeatnama EU-váldogotti ságadoalli
- Tove Søvndahl Gant, Eurohpá olgoriikkabálvalusa olmmošvuoigatvuođaossodaga hoavda, ja ON bistevaš álgoálbmotforuma lahttu (maŋŋel ođđajagimánu 1 b 2020).
- Lars-Anders Baer, Barentsráđi álgoálbmotáššiid bargojoavkku ságadoalli
- Anders Oskal, boazoálbmogiid máilmmiorganisašuvnna váldočálli
Digaštallamiin lei sáhka das got EU ja sámi ovddasteaddji ásahusaid ovttasbarggu sáhtálii ovddidit, got EU njuolggadusat heađuštit sámi ealáhusaid ja eallinvugiid, ja makkár vásáhusat leat Ruonáeatnama EU-ovddasteami ásaheami oktavuođas Brysselis. Bohte maid ovdan buorit ovdamearkkat prošeavttain main leat ovttastahttán árbedieđu ja oarjemáilmmi dutkama vai buorebut sáhtálii dustet Árktisa hástalusaid.
Sáhkavuoruid ja paneladigaštallama manná geahččat dán liŋkka bokte:
https://ec.europa.eu/info/events/eu-arctic-forum-2019-oct-03_en
