Digitála sátnegirji ja sátnegirje-áppa
Dál šaddet Sámedikki sátnegirje-áppii ja neahttasátnegirjái golbma giela ja áibbas ođđa funkšuvnnat. Ođđa áppa ja neahttasátnegirji leat ođasteamit dan sátnegirjjis mii lea Sámedikki ruovttusiiddus leamaš badjel logi jagi ja mii lea gávdnon áppa-hámis vihtta jagi.
Digitála sátnegirjái mii ovdal lei dušše julevsámegillii ja oarjánsámegillii, lea dál maiddái lasihuvvon Mikael Svonni davvisámegiel sátnegirji.
Dán ovdánahttinbarggus leat deattuhan ođđa digitála teknihka vai geavaheddjiide šaddá álki geavahit visot gielaid dán sátnelisttus. Ođđa funkšuvnnat álkidahttet sániid oahppama ja muitima.
Dál sáhttá juohkehaš ráhkadit iežas sátnelisttu mii lea ávkkálaš giellageavaheaddjái dahje oahpaheaddjái gii háliida ráhkadit omd. glosalisttu dege fáddásátnelisttu iežas ohppiide.
- Mii loktet sátnegirje-áppa vel badjelit dássái go dál sáhttit sirret sániid sierra listtuide ja juogadit daid nuppiiguin. Dat lea áibbas ođđa sátnegirje-geavahanvuohki, lohká Anders Östergren Njajta, Sámi giellaguovddáža giellakonsuleanta.
Dát áppa lea áidna áppa mas leat eanet sámegielat oktan jorgalusaiguin. Geavaheaddji sáhttá maid válljet guđe gillii áppa dieđut galget leat.
Áppa doaibmá offline ja lea nuvttá.
Go sátnegirjjit leat eambbo olámuttus de ožžot eanet sámit vejolašvuođa oahppat sámegiela, ja dat lea okta Sámedikki giellabarggu ulbmiliin.
