Sámedikkis leat stuora vuordámušat ođđa ráđđehussii
Sámediggi sávvá lihku ovddeš ja ođđa stáhtaministarii Stefan Löfvenii ja ođđa ráđđehussii. Leat olu dehálaš stuora áššit ovddabealde main lea stuora mearkkašupmi midjiide sámiide, earet eará ráđđádallanortnet, davviriikkalaš sámekonvenšuvdna ja meahceeallit.
Sámediggi lea maŋemus 25 jagi ožžon moaitámušaid sihke ON:s ja Eurohpáráđis das ahte got lea meannudan sámiiguin. Kulturdepartemeanta barggai mannan doaibmaáigodaga ođđa ráđđádallanortnega ásahemiin midjiide sámiide. Ruoŧas leat eareliiggánis geatnegasvuođat min sámiid ektui. Lea áigi heaitit daid koloniála jurddašemiin mii nu guhká leat báidnán ruoŧa politihka.
Sámediggi vuordá ahte ođđa ráđđehus joatká proseassa ráđđádallanortnegiin. Formála ráđđádallanortnet sámi álbmogiin berrelii leat diehttelas ášši dakkár riikkas go Ruoŧŧa mii áiggošii gul suddjet olmmošvuoigatvuođaid, lohká Sámedikki stivraságadoalli Per-Olof Nutti.
Sámediggi vuordá maid ahte bargu davviriikkalaš sámekonvenšuvnnain joatkašuvvá ovttasráđiid Norgga ja Suoma ráđđehusaiguin ja sámedikkiiguin.
Mii vuordit dál vástádusa iežamet gáibádussii ahte digaštallagoahtit sámedikki rievdadusevttohusa, čilge Sámedikki stivraságadoalli Per-Olof Nutti.
Meahceeallipolitihkain ferte ođđa ráđđehus dakkaviđe bargagoahtit. Mii dárbbašit doaibmi meahceeallihálddašeami mii doarju ekonomalaš, ekologalaš, kultuvrralaš ja sosiála ceavzilis boazoealáhusa vaikko seammás lea dohkálaš meahceeallidássi.
-Mii gáibidit seammalágán suoji bohccuide go dat mii meahceelliin lea, Dan suoji sáhttá hui eaŋkilit lasihit dálá meahceealli-láhkaásahussii, ii ge dan dárbbaš duođi eambbo ájihit, lohká Sámedikki stivraságadoalli Per-Olof Nutti.
Goalmmát stuora ášši lea dálkkádat ja biras. Norrlándda luondduriggodagaid ávkkástallan, ja lassáneaddji infrastruktuvra maid dát ávkkástallan mielddisbuktá, addá oanehis áiggi vuoittuid muhto eatnamat billistuvvojit agibeaivái. Boazodoallu vuoittáhallá dábálaččat dán giččus. Ruoná infrastruktuvrra, biologalaš girjáivuođa ja doaibmi ekovuogádaga haga ii ceavzze boazu, ja min dološ kultuvra ii seaillo de boahtte bulvii.
-Mii dáhttut ráđđehusa dárkilit guorahallat visot perspektiivvaid ovdalgo addá lobi ođđa sisabahkkemiidda sámi guovlluin, loahpaha Sámedikki stivraságadoalli Per-Olof Nutti.
Váldde oktavuođa:
Per-Olof Nutti, stivraságadoalli
Tel. 070-376 31 12
