Boazodoalloálbmogiid máilmmekongreassa
Borgemánu 16-20 b čoahkkanit Ruošša, Kiinná, Mongolia, Skottlándda, Kanada ja Sámi boazobargit Jåhkåmåhkkái boazoálbmogiid guđat máilmmekongressii. Kongreassa lea boazoálbmogiid deaivvadanarena gos sii besset lonohallat máhtu ja vásáhusaid, ja dat lea maiddái Association of World Reindeer Herders (WRH) organisašuvnna bajemus mearrádusorgána. Doaluide vurdet sullii 400 oasseváldi.
Máilmmeviidosaš perspektiiva
Boazoálbmogiid máilmmekongreassa lágiduvvo juohke njealját jagi. Ovddit kongreassa lei Kiinnás, Auloguyas 2013.s. Dalle lei evenka-álbmot mii lágidii kongreassa. Ovttasráđiid Ruoŧa Sámiid Riikkaservviin, Sáminuorain, Boazoeaiggádiid oktavuođain ja Jåhkåmåhkke gielddain bovde dál Association of World Reindeer Herders organisašuvdna mii dasalassin ávvuda 20 jagi, máilmmi boazodoalloálbmogiid Jåhkåmåhkkái.
- Árktalaš ja sub-árktalaš guovlluin leat badjel 20 álgoálbmoga mat barget bohccuiguin, nu ahte dat maid Ruoŧas soitet jáhkkit smávva báikkálaš ealáhussan dáppe, lea okta dain deháleamos álgoálbmotealáhusain olles cirkumpolára guovllus, čilge Helena Omma guhte lea Association of World Reindeer Herders organisašuvnna várreságadoalli.
- Kongreassas galgat čállit julggaštusa mii definere máilmmi boazobargiid oktasaš politihkalaš ulbmiliid, ja mii galgá leat vuođđun organisašuvnna bargguide, muitala Mikhail Pogoadaev, WRH stivraságadoalli.
Seminárat
Earet kongreassa de leat maiddái seminárat; duorastaga lea seminára Jåhkåmåhkes ja bearjadaga ges Naturumas Stuor Muorkkes (Stora Sjöfallet). Deháleamos fáttat kongreassas leat bohcco ja boazobargi dearvvašvuohta, biebmu ja biebmoárbevierut, dutkan ja oahpahus ja biologalaš girjáivuohta ja suddjejuvvon guovllut.
- Mis Ruoššas ja Mongolias lea stuora beroštupmi gullat Laponia hálddašeami birra. Dat lea hui buorre ovdamearkan dasa got álgoálbmogiid sáhttá searvadahttit hálddašeamis ja mearrádusdahkamis, ii ge olgguštit nu go oaidnit muhtun boazodoalloguovlluin, čilge Mikhail Pogodaev.
Boazodoalu stáhtus
Dán kongreassas várrejuvvo okta olles beaivi iešguđet guovlluid boazodoalu dilálašvuođa raporteremii. Maiddái dan oasis lea Jåhkåmåhkke ja Ruoŧŧa erenoamážit fokusis.
- Iežá guovlluid boazobargit háliidit oahppat eanet das got sámi boazoealáhus ja kultuvra Ruoŧas ovdána, sihke ekonomiija, biebmogálvoreidema ja buktagiid vuovdima ektui, lohká Johan Mathis Turi, WRH generálačálli.
- Seammás gillát Skandinavias hui garrasit boazoguohtuneatnamiid sisabahkkemiiguin, ja sisabáhkkemat dáidet vearáskit boahtteáiggis maid.
Kulturprográmma
Lea olu mii dáhpáhuvvá ja lea hui viiddis kulturprográmma kongreassabeivviid. Sihke duodječájáhusat, konsearttat ja máilmmemeašttirgilvu njoarosteamis lágiduvvojit kongreassa oktavuođas, ja kongreassa lea rabas buohkaide. Ieš čoahkkimat lea Östra skuvlla valáštallanlanjas, muhto iežá lágideamit leat maiddái Sámi Åhpadusguovddážis ja Ájttes.
Mikhail Pogodaev loahpaha:
- Min organisašuvnna leat áibbas dábálaš boazobargit vuođđudan boazobargiid várás vai min jietna nai gullošii máilmmis. Mii sávvat váimmolaš bures boahtima buohkaide geain lea beroštupmi čuovvut kongreassa ja geat háliidit vásihit, dovddiidit ja čatnat oktavuođaid álbmogiid gaskka gasku Jåhkåmåhke.
Preassaoktavuohta:
Helena Omma,
várreságadoalli,
Association of World Reindeer Herders
070-2963891
Johan Mathis Turi,
generálačálli,
Association of World Reindeer Herders
+47 950 48 331