2015:s lei ráđđehus gohččon Sámedikki kártet sámi álbmoga psykososiála dearvvašvuođa. Kárten čájehii ahte sámi álbmot veadjá heajubut dahje mihá heajubut go iežá joavkkut servodagas. Ruđaiguin maid ráđđehus dál juolluda galget ásahusat hábmet guhkilmas ja ollislaš strategiija sámi dearvvašvuođa ovddideapmái ja buorideapmái.

- Ráđđehusa ulbmil lea jávkadit daid erohusaid mat gávdnojit dearvvašvuođasuorggis iešguđet buolvvas. Sámi álbmot veadjá heajubut go iežá joavkkut servodagas muđui. Jus galgat nagodit buoridit dearvvašvuođa, ja jávkadit erohusaid de dárbbašit máhtu ja strategiijaid vai oaidnit guđiid surggiid dearvvašvuođa- ja buohccidivššus sáhttit ovdánahttit ja heivehit sámi álbmoga dárbbuide, lohká dearvvašvuođaministtar Gabriel Wikström.

- Mii fertet ain nannet sámi álbmoga iešmearrideami. Psyhkalaš dearvvašvuohta lea guovddáš oassi olbmo eallimis, ja dát juolludus lea dehálaš oassi dearvvašvuođabarggus, lohká kultur- ja demokratiijaministtar Alice Bah Kuhnke.

Máhttofierpmádaga rámma siskkobealde galgat hábmet strategiija mii lokte máhtu sámiid dearvvašvuođa birra. Rollat, ovddasvástádus ja organiseren galget maid čielggaduvvot.

Dán bargui gullá maid dat ahte guorahallat makkár doaimmat ja dikšobálvalusat ovdánahtáše sámi álbmoga dili. Áigumuš lea loktet ja čiekŋudit máhtu sámiid psyhkalaš ja somáhtalaš dearvvašvuođadili birra. Strategiijas galgá čilgejuvvot goht eanandiggi, guoskevaš regiovnnat ja sámi organisašuvnnat galget jođihit máhttofierpmádaga, sihke doaimma dáfus ja ruđalaččat.

Bargu galgá ovdanbuktojuvvot ráđđehussii ovdal ođđajagimánu 31 b. 2020.

Dát mearrádus dahkkui njukčamánu 23 b. 2017 go ráđđehus dohkkehii dan ohcamuša maid Västerbottena leana leanadiggi, Norrbottena regiovdna ja Jïemhten/Herjedaelien regiovdna Sámediggi, Ruoŧa Sámiid Riikasearvi, Landsförbundet svenska samer, Samerna riikaorganisašuvdna, SameÄtnam ja SámiNuorra ovddidedje juovlamánu 7 b. 2016.