ESV galgá dárkkistit Sámedikki
Sámedikki stivra ja hálddahus leat ovttas ráđđehushálddahusain digaštallan dárbbu dárkkistit organisašuvnna.
Ráđđehusbargogohčus
Sámedikkis lea gáržžes bušeahtta ii ge leat ovdal suitán čađahit dán bargogohččosa. Dál sáhttá dárkkisteapmi dahkkot go bargogohččosii gullá sierra ruhtadeapmi. Lea Ekonomiijastivrendoaimmahaŧ (ESV Ekonomistyrningsverket) mii dahká dárkkisteami nugo maiddái lei jagi 2010:s. Dan dárkkisteamis lei dušše hálddahus mielde. Dán háve galgá maiddái politihkalaš organisašuvdna dárkkistuvvot.
Lávdegoddeorganisašuvdna
Jagi 2012:s ásahii Sámediggi njeallje lávdegotti gieđahallat ja čađahit áššiid. Lávdegoddeorganisašuvnna effektivitehta ja stivrejupmi berre dárkkistuvvot ja stivra lea addán stivraságadoallái ovddasvástádusa bearráigeahččat ahte bargu álggahuvvo.
Ovdánahttinbargu
Hálddahus lea maŋemus jagiid bargan stivrenproseassaid ovdánahttimiin, ja geahčadan got doaimma sáhtálii beavttálmahttit. Dat organisašuvdnadárkkisteapmi mii dál álggahuvvo lea oassin ja joatkkan dan barggus.
Válbmanit guovvamánnui
ESV boahtá čađahit guorahallama hálddahusa doarjagiin. Boađus galgá ovdanbuktojuvvot maŋemusat guovvamánus 2017:s.