Ráđđehus evttoha ođđa olmmoš- njuolggusvuođaásahusa
Ráđđehus lea dál riikkabeaivái buktán strategiija got áigu ovddidit olmmošnjuolggusvuođabargguid našuvnnalaččat. Strategiija cealká ee ahte berre gávdnot sierra ásahus olmmošnjuolggusvuođaid várás mas riikabeaivvis leat váldoovddasvástádus.
–Mii oaidnit miehtá máilmmi ahte olmmošnjuolggusvuođat gáržžiduvvojit ja gažaduvvojit. Dál čájehit mii ahte Ruoŧŧa dáhttu iežá čovdosiid maiguin hukset gievrras servodaga mii nanne olmmošnjuolggusvuođaid dili, lohká Alice Bah Kuhnke, kultur- ja demokratiijaministtar, preassadieđáhusas maid Kulturdepartemeanta lea sádden.
Ráđđehus lea gávnnahan ahte ollislaš struktuvra mii sihke ovddida ja suodjala olmmošnjuolggusvuođaid berre sisdoallat čuovvovaččaid:
- nanu rievttálaš ja institušunála suoji olmmošnjuolggusvuođain, dan searvái gullá sorjjakeahtes ásahus ja ahte mánáidkonvenšuvdna inkorporerejuvvo Ruoŧa lágaide,
- buohtalastin ja systemáhtalaš bargu olmmošnjuolggusvuođaiguin almmolaš doaimmain, dasa gullá maiddái ahte čavget gáibádusaid eiseválddiide ja leanastivrraide ollašuhttit olmmošnjuoggusvuođaid,
- buoret ovttasdoaibma siviila servodaga ja ealáhusaid gaskka.
Ráđđehus atná ahte berre ásahuvvot našuvnnalaš ásahus olmmošnjuolggusvuođaid várás nugohčoduvvon Parisprinsihpaid vuođul vai nanne olmmošnjuolggusvuođaid rievttálaš ja ásahuslaš suoji. Riikkabeaivvis berre guoddit váldoovddasvástádus dán ásahusas. Lea maid riikkabeaivvi ovddasvástádus gieđahallat ášši viidáseappot daningo ášši guoská riikkabeaivvi eiseválddiide.
