Seminára lágiduvvui riikabeaiviesus ja lei riikkabeaiveáirasiid várás, eareliiggánit sidjiide geain lea ovddasvástádus oahpahus- ja minoritehtapolitihkalaš áššiin. Lea čielggas ahte Skuvlaláhka ii deavdde daid gáibádusaid mat leat áigumuššan unnitlogureforpmain. Sámi mánáid giellaealáskahttin ovdaskuvllas ja skuvllas ferte sihkkarastot. Lea dárbu loktet eanetloguservodaga ipmárdusa dáidda áššiide.

- Mii háledit čájehit got oahpahusvuogádat beahttá sámi mánáid ja maiddái čájehit man olu beliid sáhtálii buoridit, lohká Josefina Lundgren Skerk, Sámedikki giellalávdegotti ságadoalli.

Sámediggi diehtá ja lea vásihan ahte sámi oahpahus ii vuoruhuvvo eanas gielddain ii ge riikkabeaivvis/ráđđehusas.

- Sámi mánát eai oaččo dan oahppama ja oahpahusa maid lea riekti oažžut ovdaskuvllas ja skuvllas, muitala Ingegerd Vannar, Sámi giellaguovddáža bargojođiheaddji.

Unesco lea gávnnahan ahte visot sámi gielat leat heahtedilis ja dilli soames guovlluin Sámis lea hui duođalaš. Unesco raporttas mii bođii 2003:s  “Language Vitality and Endangerment” čilge got olmmošvuohta massá vástádusaid vuđolaš áššiide juohke háve go muhtun giella jápmá. Sámediggi sávašii ahte Unesco jurdagat ja oainnut sáhtáše movttiidit eiseválddiid eanet beroštit ja váldit stuorit ovddasvástádusa sámi giellaealáskahttimis Ruoŧas.

Earret Sámedikki giellalávdegotti ságadoalli Josefina Lundgren Skerk ja Sámi giellaguovddáža, de oassálasttiiga maiddái fil.doc lektor Hanna Outakoski ja váhnen Helen Bergqvist semináras.

Eanet dieđuid addá:

Ingegerd Vannar
Sámi giellaguovddáža bargojođiheaddji
070-298 16 61070-298 16 61, ingegerd.vannar@sametinget.se

Josefina Lundgren Skerk
Sámedikki giellalávdegotti ságadoalli
070-582 21 21070-582 21 21, josefina.skerk@gmail.com