Sámi bázahasat galget ruoktut Sápmái ja hávdaduvvot ođđasit
Sámedikki stivraságadoalli Sara Larsson deattuha ahte sámi bázahasat galget ruoktut Sápmái ja hávdaduvvot ođđasit. Muhto lea proseassa mii váldá áiggi.
- Stivra lea mearridan nammadit ehtalaš ráđi mii galgá leahkit ráđđeaddi orgána ehtalaš áššiin go guoská gieđahallamii ja vurkemii sámi olmmošlaš bázahasain, lohká Sámedikki stivraságadoalli Sara Larsson.
Historjjálaš dávvirvuorká lea mieđihan ahte olmmošlaš bázahasat jáhkehahtti sámi máttuin galget vurkojuvvot Ájtte dávvirvuorkkás Jåhkåmåhkis. Mearrádus bođii maŋŋel go Sámediggi leai gáibidan dan. Leat 12 oaiveskálžžu Rovnnala girkoeatnamis. Oaiveskálžžut goaivujuvvojedje bajás hávddiin jagi 1915 arkeologalaš goaivumis.
Ávžžuhus
Sámi bázahasat stáhtalaš čoakkáldagain symbolisere kolonialisma vuođu ja vearredaguid sámiid vuoste. Dal lea ávžžuhus jođus Facebookas "Begrav våra samiska förfäder" mii oaivvilda ahte Ájtte lea baskkádassii šaddan go lea mieđihan vurket oaiveskálžžuid.
Vuosttaš lávki
Sámediggi lea gáibidan ahte diet 12 oaiveskálžžu Rovnnala girkoeatnamis galget vurkojuvvot Ájttes. Dal álggus lea dehálaš ahte bázahasat bohtet ruovttoluotta Sápmái.
- Lea dehálaš vuosttaš lávki oažžut ruoktut oaiveskálžžuid Sápmái muhto ášši ii galgga dasa bisánit, dadjá Sara Larsson.
Ehtalaš ráđđi
- Dal mii galgat nammadit ehtalaš ráđi mii galga leahkit ráđđeaddi ehtalaš áššiin go guoská gieđahallamii ja vurkemii sámi olmmošlaš bázahasain. Lea dehálaš ahte mii gieđahallat áššiin buori ja čađajurddašuvvon vuogi mielde. Leat máŋga ehtalaš áššit man birra ferte ságastallat ja čoavdit ovdal go mii leat válbmasat hávdadit ođđasit bázahasaid árvvolaš vuogi mielde, deattuha Sara Larsson, Sámedikki stivraságadoalli.
Oktavuohta
Sara Larsson, stivraságadoalli, 070-378 88 24