Muittuhus skohtervuddjiide
Muitte fal ahte luovos beatnagat sáhttet baldit ja oaguhit bohccuid ja iežá elliid. Beatnagat mat cillet sáhttet baldit bohccuid ceakko rámšo báikkiide go eai bálle guohtut. Čáhppes plastihkkaseahkat leat váruhussan ahte leat bohccot lahka. Vuolit fártta!
Daga ná jus lahkonat bohccuid dahje ealu:
- Vuolit fártta dahje bisán. Bohccot lávejit guođđit láhtu jus nu dagat, eareliiggánit jus leat luottat guora. Vuoje várrogasat meaddel. Jus bohccot eai guođe láhtu de soaitá ahte dat baluiguin ruhttet láhtu mielde. Bisán, jáddat mutuvrra ja vuordde oanehaš.
- Jus ii leat vejolaš jorgalit, vuoje dasto meaddel gokko orro heiveme, omd jeakkis. Jus lehpet máŋga skohtera fárrolaga, de galgá dušše okta skohter várrogasat vuojistit bohccuid ovddabeallái vai dat gárvet ja guđđet láhtu. Daga duoddaris dan seamma – okta skohter vuodjá meaddel vuogas báikkis.
Lea hui dehálaš ahte eai buohkat eai vuoje meaddel oktanis. Mađi eanebut gásejit, dađi eanet rigearra. Bohccot ruohttagohtet dalle njuolga ovddos go doivot juogamii oaguha.
Go bohccot bisánit ja okta boazu guođđá láhtu, de vuorddaš dasságo visot bohccot lávkejit eret láhtus. Leage gierdevaš ale ge huša, de sáhttet bohccot fas máhccat láhtu nala vai gostet ruohttat. Boazu lea ealli mii čuvvoda nuppi, jus okta spiehkasta láhtut eret, de čuovvolit iežát.
Go vuoját skohteriin duoddaris de lea álkit áicat bohccuid. Dalle sáhttet áiggil dollet iežá geainnu vai garvvát bohccuid it ge ráfehuhte daid. Vuoje várrogasat meaddel nu guhkkin eret dain go sáhtát.
Geahččal garvit baskkádagaid gos bohccot leat guohtume vai it ráfehuhte daid. Bohccot dárbbašit ráfis guohtut ja suoji guoddináiggi.