Sámejienastuslohku

Háledat go ilmmuhit iežat sámejienastuslohkui?
Maŋemus ohcanbeaivi lea 20 b.golggotmánus 2012 jus galggat beassat jienastit válggas 2013.

Čále olggus skovi
Deaddil  skovi liŋkka olgešspálttas dán siiddus. Deavdde iežat dieđuid njuolga dihtoris. Čále olggus skovi, čále vuollái ja sádde Sámedikki hálddahussii, Box 90, 981 22 GIRON.

Diŋgo skovi
Jus it sáhte čállit olggus skoviid ruovttus, sádde e-boastta namain ja čujuhusain: kansli(a)sametinget.se dieđáhusain: ”Mon háledan skovi mainna ilmmuhan iežan sámejienastuslohkui” Dehe riŋge 0980-780 30 ja diŋgo skovi. Dieđit makkár gielas skovvi galgá leahkit ja muitte fal nama ja čujuhusa!

Geat besset mielde sámejienastuslohkui?

• Jus du váhnen lea dehe lea leamaš mielde Sámedikki jienastuslogus don dušše dieđihat váhnema nama skovis.

• Sámediggelága mielde don galggat deavdit guokte dovddaldaga. Vuosttaš lea subjektiivvalaš dovddaldat, dan ahte don ieš oaivvildat iežat sápmin. Nubbi lea objektiivvalaš dovddaldat mii guoská gillii. Dus lea dehe lea leamaš sámegiella ruovttugiellan dehe juobbá du váhnemiin, áhkuin dehe ádjáin lea dehe leamaš sámegiella ruovttugiellan. Lea dasto dehálaš ahte don duođaštat ahte olmmoš geasa čujuhat hálddaša sámegiela.

Mearrádus
Lea Sámedikki válgalávdegoddi gii váldá mearrádusa. Válgalávdegoddi ii geahčá sohkavuhtii muhto báicce dan ahte ohcci deavdá gielladovddaldaga láhkateavstta mielde. Lea vejolaš váidalit mearrádusa.

Gaskaboddosaš jienastuslohku
Gaskaboddosaš jienastuslohku dahkkojuvvo maŋemusat 15 b.skábmamánus jagi ovdal válgajagi. Gaskaboddosaš jienastuslohku lea rabas olbmuide dárkkistit báikkiin maid guovddáš válgaeiseváldi lea mearridan ovttas Sámedikkiin. Sámejienastuslohku galgá sisdoallat dieđuid sámiid birra mat ovdal leat leamaš mielde jienastuslogus eaige leat gáibidan beassat eret jienastuslogus ja dieđuid sámiid birra mat leat ilmmuhan iežaset jienastuslohkui § 4 mielde ja devdet eavttuid § 3 mielde. Eanet dieđut ilmmuhuvvojit medias ja bohtet gávdnot ruovttusiiddumet.

Váidaleapmi
Son gii lea ilmmuhan iežas iige leat beassan mielde gaskaboddosaš jienastuslohkui sáhttá váldalit dan. Juohke okta gii lea beassan mielde jienastuslohkui sáhttá maiddái váidalit ahte soames iežá olmmoš lea beassan mielde jienastuslohkui. Váidaleapmi galgá boahtit sisa leanastivrii dan leanas gos Sámediggi lea čálihuvvon (Norrbottena leana) maŋemusat 15 b.juovlamánus jagi ovdal válgajagi. Váidaleapmi mearrádusas geahččaluvvo almmolaš čoahkkimis leanastivrras 15 b.guovvamánus válgajagis dehe jus 15 beaivi lea lávvordat dehe bassi boahttevaš mánnodaga.

Loahpalaš sámi jienastuslohku
Loahpalaš sámi jienastuslohku galgá leahkit válmmas maŋemus 1 b.njukčamánus válgajagi.