Organisašuvdna

Sámiid Riikkabeaivi
Ii gávdno oktage eiseváldi Ruoŧas mii sulastahttá Sámedikki. Sámediggi lea sámiid riikkabeaivi ja organisašuvdna sáhttá buohtastit gielddalaš organisašuvnnain. Muhto Sámedikkis ii leat vearrováldinnjuolggus ja Sámediggi ii sáhtte ásahit lágaid.

Politihkalaš stivrejupmi
Politihkalaš stivrejupmi lea Sámedikki dievasčoahkkin ("sámiid riikkabeaivi") ja Sámedikki stivra ("ráđđehus"). Sámedikki dievasčoahkkimis lea čoahkkinjođihangoddi mii ráhkkanahttá ja ovddasvástida dievasčoahkkima čoahkkimiid.

Hálddahus
Hálddahusas lea beaivválaš ovddasvástádus doaimmahit eiseváldedoaimmaid. Sámediggi stáhtalaš eiseváldin gullo Báikegoddedepartemeantta vuollái. Váldohálddahus lea Gironis ja báikkálaš čállingottit gávdnojit Jåhkåmåhkis , Dearnas ja Staares. Hálddahusa organisašuvdna lea juhkojuvvon golbma ossodahkii (geahčá olgešspálttas).

Bargodoaimmat
Sámedikki vuđolaš bargodoaibma lea bargat ealli sámi kultuvrra ovddas. Dán oktavuođas galgá kultuvrra geahččat veaháš viidát oaidninčiegas ja dasa gullojit maiddái sámi ealáhusdoaimmat. Muđui leat bargodoaimmat reglerejuvvon sámediggelágas (SFS 1992:1433) gos dadjojuvvo ahte Sámediggi galgá:

1. Mearridit juohkima birra stáhta doarjagis ja Sámefoandda ruđain sámi kultuvrii ja sámi organisašuvnnaide ja iežá ruđain mat leat sámiid oktasaš geavaheami várás,

2. Nammadit sámeskuvlastivrra 8 kap. 8 § mielde Skuvlalágas,

3. Mearridit mihttomeriid sámegiellabargui ja jođihit sámi giellabarggu,

4. Oassálastit servodatplánemis ja geahččat bearrái ahte sámi dárbbut váldojuvvojit vuhtii, earret iežá boazoealáhusa dárbbuid eana- ja čáhcegeavaheami,

5. Dieđihit sámi dilálašvuođaid birra,

6. Doaimmahit eará bargogohččosiid mat bidjojuvvojit Sámediggái lága dehe iežá njuolggadusa mielde (Láhka 2006:803).